Mandaue, Talisay pabiling kampiyon sa GUV Cup

CEBU, Philippines - Gipangpilde sa Mandaue ug Talisay volleyball teams ang managlahi nilang karibal aron panalipdan ang ilang tagsa-tagsa ka korona sa 7th Governor Gwen Garcia Unity Volleyball (GUV) Cup kagahapon didto sa nagsugwak nga Cebu International Convention Center (CICC) sa Mandaue City.

Dobleng selebrasyon ang naangkon sa Mandaue dihang ang ilang batan-ong counterparts midaog batok sa Moalboal sud sa straight sets, 26-24, 25-20 aron sakmiton ang labing unang korona sa grassroots (elementary) division.

Sa sayo pa, ang Mandaue belles mibuntog sa Talisay sa upat ka sets aron angkonon ang women's crown.

Dominante kaayo ang Mandaue sa first set diin miposte kini og 25-10 nga kadaugan, apan ang Talisay mibawos sa second set, 25-19, luyo sa makabungog nga ataki nilang Joy Gazelle Cases, Florian Guttierez, April Hingpit ug Jullette Mae Marikit.

Sa ikatulong set, sikit na kaayo ang aksiyon nga nagtabla kini sa makalima ka higayon, ang katapusan sa iskor, 17-all dihang si Philippine team member Joanne Bunag, Genie Sabas, Erika Camille Verano ug Jusabelle Brillo milusad og 8-1 rally aron hatagan ang Mandaue og laing daog, 25-18.

Sa fourth set, kontrolado na sa Mandaue ang duwa nga maoy hingpit mitapos sa Talisay, 25-15.

Sa men's bracket, ang Talisay spikers mipukan sa Liloan sa straight sets, 25-13, 25-21, 25-23.

Ang finale sa unom ka bulan nga torneyo gitambongan mismo ni Cebu Gov. Gwendolyn 'Gwen' Garcia, ang nagpaluyo ning labing daku ug mabulokon nga volleyball event sa nasud. Uban ni Gov. Garcia mao si Philippine Sports Commission (PSC) chairman Richie Garcia, Philippine Volleyball Federation (PVF) president Gener Dungo ug ubang mga opisyal sa Cebu Volleyball Association (CEVA) nga gipangulohan ni Glenn Soco ug Jun San Juan.

Gawas sa mga tropeyo ug medalya, ang mga kampiyon sa men ug women's division mibulsa og P100,000 matag usa, samtang ang runners-up nakadawat og P50,000.

Ang kampiyon sa grassroots division nakaangkon og P50,000, samtang ang runner-up mibitbit og P30,000.  (BANAT SPORTS)