Viloria milampos pagdepensa sa bakus

CEBU, Philippines - Gitubag ni Fil-American Brian “Hawaiian Punch” Viloria ang hagit sa pagdepensa sa iyang bakus batok ni No.9 pound-for-pound fighter Giovanni Segura kagahapon didto sa Ynares Sports Center .

Sa labing una niyang depensa sa iyang WBO flyweight title, si Viloria mipakita sa iyang kusug aron paundangon sa eight round si Segura .

Sayung gibirahan ni Viloria ang kanhi Mexican champion kinsa nakahiagum og dakung burut sa tuong bahin sa iyang ulo agi sa mga makusug nga hook sa Pinoy boxing champion.

Nindot nga kombinasyon sa uppercut ug body punches ang gibuhian ni Viloria nga tataw kaayo nga nakapaluya ni Segura .

Pag-abot sa eight round, usa ka makusug nga hook ang subling gibuhian ni Viloria nga maayo kaayong pagkatugpa sa hubag sa ulo ni Segura kinsa misarasay usab paingun sa korner.

Nakita sa referee nga naglisud na pag-recover si Segura rasun nga gihunung niya ang away sa ika-29 segundos sa maong round.

Si Viloria mipalambo sa iyang record ngadto sa 30-3, 17KOs, samtang si Segura nakahiagum sa iyang ikaduhang pilde sud sa 31 ka away. (LPM)(BANAT NEWS)