UC Webmasters gitiwasan sa San Beda sa PCCL 2011

CEBU, Philippines - Nahanaw na sa hingpit ang paglaum sa University of Cebu (UC) Webmasters nga moduwa sa finals sa 2011 Philippine Collegiate Champions League (PCCL) dihang gipahamtangan na sab og laing kapildihan, ning higayona batok sa San Beda College (SBC) Red Lions, 83-77 kagahapon didto sa Filoil Flying V Arena sa San Juan, Metro Manila.

Ang Webmasters una nang napilde niadtong Martes sa mga kamot sa two-time defending champion Ateneo de Manila University (AdMU) Blue Eagles sa iskor nga 53-100.

Apan lahi sa ilang duwa batok Ateneo, nahimong kulbahinam ang sangka sa Webmasters ug Red Lions diin nakalabaw pa ang two-time CESAFI champion sa unang kuwarter sa iskor nga 22-20.

Nakabuylo si 6-foot-9 center Junemar Fajardo ug iyang gidaro ang mas gagmay nga sentro sa Red Lions.

Si Fajardo uban ni Edward Pao nagkumboya og 28 puntos alang sa UC sa halftime.

Wala mahimong suliran sa UC ang opensa, apan ang daghan nilang turnovers maoy nakabuslot sa ilang duwa nga gipahimuslan sab sa San Beda aron makuha ang singko puntos nga labaw, 56-51, sa 1:23 sa third period.

Gipakusgan pa sa San Beda ang ilang atake sa final period sa pagpangulo nilang Romeo Dela Rosa ug Mar Villanueva aron inaton ang labaw ngadto sa siyete puntos sa iskor nga 79-72 sa katapusang dos minutos sa duwa.

Ang three-point ni Villanueva sa nahabiling 1:13 minutos maoy miselyado sa daog sa Red Lions.

Si Dela Rosa mibubo og 25 puntos alang sa San Beda, samtang si Fajardo maoy leading scorer sa Webmasters sa iyang 24 puntos.

Ang Webmasters makigsangka sa No.1 team 

San Sebastian Stags College Recoletos (SSC-R) Golden Stags sa alas-4 sa hapon sa walay kuwenta nilang duwa.  - BANAT NEWS