Cebu mobuak rekord sa 21K Unilab Run United

CEBU, Philippines - Masaligon ang mga organizers sa Cebu leg sa Unilab Run nga mabuak nila ang rekord sa mga nag-unang leg karong Disyembre 18 didto sa Asiatown I.T. Park sa Brgy. Apas, ning siyudad.

Sa pagka karon, ang Davao leg mao ang nagkupot sa labing daghang partisipante nga 4,200 runners, apan masaligon ang Cebu leg organizers nga malabwan nila kini sa dili pa ang deadline sa registration.

Ning pagsulat, may 2,200 runners na ang nagparehistro ug gituohan nga modoble pa kini sa dili pa ang katapusang adlaw sa registration sa Disyembre 16.

Si race director Kenneth Casquejo mipahibalo nga sirado na ang registration alang sa 21K half-marathon. Ang nagpadayon mao na lang ang 10K, 5K ug 500m kiddie run.

Niadtong buot mosalmot, mahimong magparehistro sa RUNNR sa Ayala, Toby’s sa SM City-Cebu ug sa Cebu City Sports Center. Aduna usab on-line registration www.unilabactivehealth.com ug www.runrio.com.

Ang registration fee nagkantidad og P400 alang sa 10K, P350 sa 5K, P300 sa 3K ug P200 alang sa 500m kiddie run.  - BANAT NEWS