Berberio, Sanchez nidominar sa 2nd Frankie Radaza Run

CEBU, Philippines - Gidominar nilang Charlie Berberio ug Preciosa Sanchez ang premier division sa 2nd Frankie Radaza Run kagahapon didto sa Centennial Park ubos sa Marcelo Fernan Bridge.

Si Berberio maoy hari sa 12K men’s open human niya gitapos ang lumba sa oras nga 48:21. Sila si Fernando Lubas (50:45) ug Vincent Badajos (53:29) maoy mi-okupar sa ikaduha ug ikatulong dapit.

Sa iyang bahin, si Sanchez mao sab ang unang milabang sa finish line sa 12K women's class sa oras nga 1:08.14. Mipahiluna sa ikaduha si Rhoda Oporta sa oras nga 1:10.41 ug ikatulo si Jemilyn Espehon nga mi-oras og 1:13.34. 

Si Israel Dignos maoy kampiyon sa 8K men’s division sa oras nga 33:50 batok ni Diaz Teodorico sa ikaduhang dapit sa oras nga 34:30. Si Jeffrey Igoy nga mi-oras og 37:56 miangkon sa ikatulo.

Ang top three finishers sa 8K women’s open mao sila si Nao Idio (47:03), Maria Lorena Samoy (54:05) ug Diana Balong-as (59:08).

Si Gary Garcia maoy labing paspas sa 4K open sa oras nga 16:35, samtang si Sophia Rosario sa women’s division sa oras nga 27:52.

Ang anak ni Frankie Radaza ug Lapu-Lapu City councilor Harry Radaza miingon nga ang salapi nga matigom sa lumba maoy gamiton sa pagpamalit og pinaskohan alang sa streetchildren sa maong siyudad.

Dugang pa niya ang lumba gilusad agi'g pahinungod sa mitaliwan nga si Atty. Frankie Radaza, usa ka philanthropist ug manghod ni Congressman Arturo Radaza.  (BANAT SPORTS)