UC nakasud sa final 4

ORMOC CITY , Philippines - Diriyot madisgrasya ang University of Cebu (UC) Webmasters dihang napapas ang 22 puntos nilang labaw, apan bisan pa niini, nakahimo gihapon sila pagkulit og 63-58 nga kadaugan batok sa higpit nilang karibal Southwestern University (SWU) Cobras aron ilhong hari sa Southern Islands ug moabante sa Philippine Collegiate Champions League (PCCL) Final Four niadtong Miyerkules sa gabii didto sa nagpunsisok nga Ormoc Superdome.

Si Edward Pao maoy mihatag sa Webmasters sa ilang kinadak-ang labaw nga 22 puntos human mosulod ang iyang ika-upat nga triple, 55-33 sa nahabiling 1:09 sa third period.

 Mibalik kasaba ang nahilom untang pro-SWU fans dihang usa ka mainitong rally ang gipasiugdahan ni Eleazar Armecin pagsugod sa fourth period ug mas mihugot ang ilang depensa nga nakaparatol sa Webmasters.

Nahimong kulbahinam ang duwa dihang misikit ang Cobras, 58-61 human sa basket ni 6-foot-6 center Justin Aboude sa katapusang 58.9 segundos sa duwa.

Misipyat ang Webmasters sa ilang duha ka possessions nga mao na unta ang higayon sa Cobras aron ilogon ang momentum. Apan ang Cobras natakdan kay hasta sab sila nagsige sab og kasipyat hangtod nga nahimutang na sila sa penalty.

Si Robinson Mohammad maoy miiskor sa insurance free throws sa katapusang kuwatro segundos aron pabawnan ang CESAFI "back-to-back" champions og singko puntos nga kadaugan.

Ang 6-foot-9 center nga si Junemar Fajardo maoy nangu sa Webmasters sa iyang 21 puntos.   Sila si Pao ug Quinton Brian Heruela miabuno og 14 puntos matag usa.

Sunod sangkaon sa Webmasters mao ang Ateneo Blue Eagles unya sa Lunes didto sa FilOil Flying V Arena sa San Juan, Metro Manila.

Ang pilderong Cobras gipangulohan ni Armecin, kinsa mipupo og 23 puntos, samtang si Aboude mihipos og 20 puntos. 

PUNTOS MATAG USA

UC (63) - Fajardo 21, Pao 14, Heruela 14, Bercede 6, Mohammad 5, Ampoon 2, Aranas 1

SWU (58) - Armecin 23, Aboude 20, Guillena 10, Nalos 4, Ortuyo 2, Pacquiao 1  (BANAT SPORTS)