Boom Boom mag-public sparring

CEBU, Philippines - Tulo ka ALA boxers angmopahigayon sa katapusan nilang public sparring karong Sabado didto sa PEZA Football Field sa Mactan, Lapu-Lapu City.

Mangu sa public sparring mao si IBF International featherweight champion Rey 'Boom Boom' Bautista, kinsa moaway sa main event sa "Pinoy Pride X" batok ni Mexican knockout artist Miguel Angel Mendoza karong Disyembre 10 didto sa Hoops Dome sa Lapu-Lapu City.

Mahinungdanon kini nga away alang ni Bautista tungod kay gawas sa pagdepensa sa iyang bakus, isugal usab niya ang kahigayonan nga moaway sunod alang sa world title batok ni Australian champion Billy Dib.

Dili basta-basta si Mendoza tungod kay gikalisangan kini sa 122 lbs. division sa iyang record nga 17 ka daog nga pulos pinaagi sa knockout.

Uban ni Bautista sa public sparring mao sila si OPBF flyweight titlist Rocky 'Road Warrior' Fuentes ug Genesis 'Azukal' Servania.

Si Fuentes makigsangka ni WBC International silver light flyweight champion Lookdiaw Tor Buamas sa Thailand , samtang si Servania makigbinukbukay sa Mehikanong si Marcos Cardenas.  (BANAT SPORTS)