Magandang pamamaalam ni Walbert

BEKASI WEST JAVA, Indonesia --- Binigyan ni Walbert Men­doza ang sarili ng magandang pamamaalam sa paglahok sa SEA Games nang kunin ang gintong medalya sa paboritong men’s individual sabre na pinag­labanan ka­hapon sa Uni­versity of Brunei dito.

Nanaig sa palitan ng tusok si Mendoza kay Than An ng Vietnam, 15-14, at mabawi ang gintong hinawakan mu­la 2001, 2003 at 2005 edisyon ng SEA Games.

Nagwakas ang streak ni Mendoza sa 2007 Thailand nang pumangalawa lamang at hindi nagkaroon ng pag­ka­kataon na mabawi ito sa Laos dahil inalis ang fencing bu­nga ng kawalan ng pasilidad.

Lumayo na si Mendoza sa 13-8 pero tumawag ng time­out si Than at ito ang nakasira sa momentum ng Fi­lipino fencer at nakatabla ang katunggali sa sumunod na palitan.

“Sinikap kong ibalik ang focus sa laro at tinapatan ang pa­giging agresibo niya,” wika ni Mendoza na nagsimula mag­laro sa SEAG noong 1997 sa Jakarta sa edad na 18- anyos.

Wala nang balak na maglaro pa sa regional games si Mendoza at kontento na nang mabawi ang titulong ha­wak.

Umaasa naman si national coach Orly Viscayno na madaragdagan pa ang gintong medalya na ito sa pag­papatuloy ng aksyon ngayon.