Fuentes daku'g paglaum

CEBU, Philippines - Mihayag ang paglaum ni ALA Gym fighter Rocky 'Road Warrior' Fuentes nga makakuha og kahigayonan nga moaway sa world title, apan kinahanglan una siyang modaog sa iyang sangka sa Pinoy Pride X sa Disyembre 10 didto sa Hoops Dome sa Lapu-Lapu City.

Ang OPBF flyweight champion moharong sa wala pa mailhing kaatbang, apan mipasalig ni ALA Promotions president Michael Aldeguer nga   lig-on ang kontra ni Fuentes.

Ang garbo sa Brgy. Mambaling nga si Fuentes (29-6, 17KOs) tinguhang mokulit sa iyang ika-11 nga sunod-sunod nga daog.

Si Fuentes usa sa mga gitan-aw sa ALA nga hatagan og kahigayonan nga moaway sa world title tungod usab sa taas nga rating niini sa upat ka major boxing organizations sa kalibotan.

Ang 25-anyos nga si Fuentes maoy rank No. 4 sa WBC ug IBF, rank No. 7 sa WBA ug No. 6 sa WBO.

Paninguhaon ni Fuentes nga modaog aron mas mapalambo pa ang iyang rating ug makuha na ang usa ka world title shot sa sunod tuig. - (BANAT NEWS)