CTU Centennial Lawn Tennis Cup nagmalampuson

CEBU, Philippines - Ang tandem nilang Severino Boy Romano ug Eugene Ermac maoy misakmit sa group B title sa Cebu Technological University (CTU) Centennial Celebration Presidential Lawn Tennis Cup kagahapon didto sa tennis court sa maong tunghaan.

Gipilde nilang Romano ug Ermac ang paresan nilang Nelson Maturan ug Romarito Lomeria sa final round, 8-4.

Sa laing duwa sa kampiyonato, sila si Zaldy Guinocor ug Allan Marinas mipukan nilang Michael Suson ug Napoleon Flores, 8-7 (7-4) aron sakmiton ang group C title.

Sa duwa alang sa ikatulong dapit, ang tandem nilang Julius Taghoy ug Felix Turbonado mibuntog sa duo nilang Melvin Abarquez ug Cesario Gomez, 8-4 sa group C, samtang sila si Erwin Allego ug Edgar Tibay mipukan nilang Jerry Rich Densing ug Concordio Coliao, 8-7 (7-4) sa group B.

Ubos sa tema "Reminiscing and relishing the century of physical wellness through Lawn Tennis Cup," ang torneyo usa sa mga highlights sa Centennial Celebration sa CTU nga gidumala karon sa ilang presidente Dr. Bonifacio S. Villanueva. - (BANAT NEWS)