Kazuma naghinam-hinam na batok Dela Peña

CEBU, Philippines - Naghinam-hinam na si Edjede Kazuma sa Japan nga mosukod sa abilidad ni JR Dela Peña sa Talamban sa ilang away sa Summit Natural Drinking Water Amateur Fight Series karong Domingo didto sa Gaisano Countrymall carpark.

Ang duha nga magsangka ubos sa 58 kgs. division, maoy main event sa amateur boxing series nga gipasiugdahan sa Summit Natural Drinking Water ug ALA Promotions.

Gawas sa Dela Peña-Kazuma bout, mosalmot usab sa labing unang higayon ang mga boksidor gikan sa Abellana National School (ANS) ug sa Southwestern University (SWU).

Ang ANS mopadala og tulo ka boksidor nga naglakip nilang Raymond Namocatcat, Jimboy Hilonggo ug Rioxel Tabugon, samtang ang SWU moparada nilang Kenan Villaflor, Zorro Babel Arsola ug managsuong Refuela nga sila si Ian ug Allan.

Sangkaon sa mga boksidor sa ANS ug SWU ang mga rising amateur sensation gikan sa Philippine-Australian Boxing Club (PABC), Talamban, Cabancalan, Mabolo, Bacayan ug Camotes Island. (BANAT SPORTS)