Viloria mapapalaban sa dating ka-spar sa pagdepensa ng WBO title

MANILA, Philippines - Maaaring idepensa ni Fil-American Brian Viloria ang kanyang suot na World Boxing Organization (WBO) flyweight champion laban sa dati niyang sparring partner na si Mexican-American Giovani Segura.

Ito ay posibleng itakda sa Disyembre 10 sa Manila, ayon sa ulat ng RingTV.

Tangan ni Viloria, dating World Boxing Council (WBC) at International Boxing Federation (IBF) light flyweight titlist, ang kanyang 29-3-0 win-loss-draw ring record kasama ang 16 KOs, habang dala ni Segura ang 28-1-1 (24 KOs).

Nakuha ni Viloria ang WBO flyweight belt matapos talunin si Julio Cesar Miranda via unanimous decision noong Hulyo.

Kasalukuyang No. 3 ang 30-anyos na si Viloria sa listahan ng The Ring flyweight division, samantalang No. 9 naman ang 29-anyos na si Segura.

Lumalagay si Segura bilang No. 1 contender para sa WBO belt ni Viloria. Ngunit ito ang maaaring unang pagkakataon na labanan siya sa flyweight class makaraang magkampeon sa WBO at WBA light flyweight division.