Magis Eagles nakabentaha na sab sa series

CEBU, Philippines - Nag-wild si Jari Igna ug mi-iskor kini og 15 puntos tanan iyang nahimo sa fourth quarter lakip na ang tulo ka triples aron baswaton ang Sacred Heart School-Ateneo de Cebu (SHS-AdC) Magis Eagles ngadto sa 73-69 nga kadaugan batok sa University of the Visayas (UV) Baby Lancers sa Game-3 sa ilang "best-of-five" championship series sa 11th Cebu Schools Athletic Foundation Inc. (CESAFI) basketball event kagabii didto sa Cebu Coliseum.

Sa maong kadaugan, ang Magis Eagles nakabentaha na sab    sa   series nga nagtangag og 2-1 nga win-loss record.

Ang three-point play ni Igna, kinsa gi-foul ni Nelson Peralta sa katapusang 2.8 segundos maoy naghatag sa Magis Eagles og kuwatro puntos nga labaw.

Apan si Henric Dawn Ochea maoy topscorer sa Magis Eagles nga milawog og 17 puntos.

Sa gihapon, si Andres Paul Desiderio mao na sab ang nangu sa Baby Lancers uban ang 16 puntos, samtang si Matthew Oche mikandos og 11 puntos.

Usa na lang ka daog ang dagiton sa Magis Eagles aron hingpit na nilang maangkon ang korona sa secondary division.

Ang Game-4 himuon ugma didto gihapon sa Cebu Coliseum.

Ning pagsulat, ang Game-3 sa collegiate division tali sa defending champion University of Cebu (UC) Webmasters ug Southwestern University (SWU) Cobras padayon pang nagkumbati.  (BANAT SPORTS)