Alaska mopukan sa Petron

CEBU, Philippines - Lab-as pa gikan sa ilang kadaugan batok sa Barako Bull sa miaging gabii nga nakabugto sa ilang lima ka nagkadinang pilde, ang Alaska Aces masaligon nga modaog batok sa Petron Blaze Boosters sa labing unang bearing   PBA out-of-town game nga pagadumalaon sa kagamhanan sa dakbayan sa Lapu-Lapu ugma sa gabii didto sa Hoops Dome.

"We have a big chance to win this game," matud pa ni Alaska coach Joel Banal atol sa press conference kagahapon didto sa Old Spaghetti House sa SM City- Cebu.

Rason sa dakung kompiyansa sa Alaska mao ang nasinati karon nga tulo ka sunod-sunod nga pilde sa Petron ug gawas pa niini, dili usab makaduwa ang Sugbuanong shooter nga si Dondon Hontiveros tungod sa injury.

Wala hinuon mahayi ni Banal ang iyang mga players sa ngil-ad nilang sinugdanan ug nagtuo siya nga natural lang kini tungod kay nag-adjust pa sila sa dakung kausaban sa coaching system.

Nasayran nga kini ang labing unang season sa Alaska ubos ni Banal human mobiya ang multi-titled coach nga si Tim Cone nga tua na magtikaw-tikaw sa B-Meg Derby Ace Llamados.

"Purely adjustment, the players are adjusting to the new system and hopefully Saturday we will continue to win," dugang pa ni Banal.

Ang Alaska magsalig sa ilang mga starters nga sila si Sonny Thoss, LA Tenorio, Cyrus Baguio, Brandon Cablay ug Tony Dela Cruz.

Sa laing bahin, ang Blaze Boosters ni coach Ato Agustin moabot dinhi sa Sugbu karong buntag ug mohimo og press luncheon uban sa media diha sa Royal Concourse Restaurant.

Ang mga tiket sa Petron-Alaska showdown nagkantidad og P800 sa ringside, P500 sa lower box, P300 sa upperbox ug P100 sa general admission.   (BANAT SPORTS)