8 gold sa SBC tankers

MANILA, Philippines - Nakakasa na ang ikatlong sunod na titulo at pang-anim sa kabuuan sa San Beda, kung men’s swimming title sa 16th PSC-Philippine University Games ang pag-uusapan na ginaganap sa Villareal Sports Complex, Roxas City, Capiz.

Sa pangunguna ni NCAA MVP Wilfredo Sunglao Jr., winalis ng Red Lions ang unang walong events na pinag­labanan sa pagbubukas ng pool competition kahapon habang ang nagdedepensang kampeon sa kababaihan na UP ay nanguna rin sa kinuhang limang ginto.

Ang 19-anyos na second year estudyante na kumukuha ng kursong Marketing at noong nakaraang taon ay Rookie of the Year sa NCAA, ay nangibabaw sa 100m back (1:02.50) at 100m free (56.02) bukod pa sa naging bahagi ng 4x100 medley relay (4:18.24) at 4x50 free (1:45.38).

Sina Jodie De Leon at Arianne Velasquez ay may tig-dalawang ginto para ibandera ang UP na binibigyan naman ng magandang laban ng San Beda na unang sumali sa dibisyon.

May tatlong ginto at tig-isang pilak at bronze medal ang San Beda at sinasandalan nila ang husay ni NCAA MVP Hannah Dato na umani ng dalawang ginto sa larangan ng 400m free (4:45.39) at 200m Individual Medley (2:23.41).

Umani naman ng dalawang ginto ang FEU sa wo­men’s athletics habang dalawa rin ang kinuha ng UST sa men’s division sa pagsisimula ng aksyon sa track and field.