Colonnade Grand Prix Chess Series sugdan karon

CEBU, Philippines - Mokabat ngadto sa P20,000 nga ganting salapi ang giandam alang sa mga mananaog sa Colonnade Grand Prix Chess Series sugod karong adlawa diha sa Colonnade Mall sa dalan Colon, ning siyudad.

Ang tulo ka adlaw nga kompetisyon gipasiugdahan sa Cebu Executives and Professional Chess Association (CEPCA) ug sa National Chess Federation of the Philippines (NCFP).

Mokampiyon sa open category mobulsa og P5,000, ang mo-okupar sa ikaduha makadawat og P3,000, samtang ang ikatulo makaangkon og P2,000. Ang mopahiluna sa ikaupat makadawat og P1,000.

Ang motapos gikan sa ikalima hangtod sa ika-10 gantihan og P500 matag usa.

Ang makampiyon sa CEPCA members ug ingon man sa senior citizens, kiddies ug ladies categories makadawat og P1,000 matag usa.

Aduna kini registration fee nga P150 alang sa open ug P75 alang sa kiddies ug ladies category.

Sa dili pa sugdan ang kompetisyon, si Cebu City Mayor Michael Rama mopanumpa sa bag-ong hut-ong sa CEPCA officers nga pangulohan sa ilang presidente Romualdo Muralla Jr.

Ubang mga opisyales naglakip nilang Jun Kidlat (VP External), Fabio Abucejo (VP Internal), Dante Arguelles (secretary), Ele Berciles (treasurer) ug Roger Reyes (auditor).

Ang mga sakop sa Board of Directors mao sila si Jun Olis, Mandy Baria ug Nic-Nic Climaco.  (BANAT SPORTS)