Rollway nakaipsot sa OT

CEBU, Philippines - Nangayo pa og dugang singko minutos kun overtime ang Rollway Customs Brokerage ni team owner Rolly dela Pieza una nila madispatsar ang Mactan Diamond, 100-98 sa kulbahinam nilang duwa sa commercial division sa Lapu-Lapu Fiesta Mayor's Cup basketball tournament didto sa Lapu-Lapu City gym.

Unang miarangkada ang Rollway aron molansang og 23-20 nga bentaha sa first period, apan ang Mactan Diamond sa giya ni Rowen Tagalog nakarekober sa sunod kuwarter ug mao na ang nakapabor sa halftime, 44-38.

Namintinar sa Mactan Diamond ang ilang labaw sa final half ug nag-ung-ong na unta sila sa ganghaan sa himaya dihang nagpaabot na lang sa katapusang pitik sa himalatyong oras human sila milabaw og tres puntos, 83-80. Apan sa wala damha, si Reno Berido mitugpo sa iyang mahinungdanong three-pointer nga nakapatabla sa iskor, 83-all sa nahabiling tres segundos sa regulasyon nga maoy mitukmod sa duwa ngadto sa overtime.

Sa dugang singko minutos, nagsinukliay sa ilang mga puntos ang duha ka kampo hangtod nga nagtabla na sab kini, 98-all sa katapusang 12 segundos.

Higayon na sab unta sa Mactan Diamond nga maangkon ang daog dihang ila ang ball possession, apan nasipyat ang ilang katapusang tira ug nailog sa Rollway ang bola. Ang tira ni Art Soroño maoy hingpit nga mitak-op sa duwa.

Wala sab kapugngi si Jerry Lomongsod, kinsa milansang og unom ka triples alang sa iyang 26 puntos aron pangulohan ang Rollway ni coach Chaky Caro. Si Berido miabuno og 20 puntos, samtang si Soroño, kinsa maoy bayani sa kadaugan mitimbre og 12 puntos.

Si Tagalog, kinsa miburak og 27 puntos mao sab ang nangulo sa pilderong Mactan Diamond, gisundan ni Renan Capoy nga adunay 18 puntos. Sila si Arnel Factor, Predintor Toong ug Jaya Esperat nagkumboya og 37 puntos.

Puntos Matag Usa

ROLLWAY (100) - Lomongsod 26, Berido 20, Soroño 12, Tarono 9, Villanel 8, Maloloy-on 7, Panaguiton 6, Wagas 2, Amistad 2, Baguio 2

MACTAN DIAMOND (98) - Tagalog 27, R. Capoy 18, Factor 14, Toong 13, Esperat 10, Baribe 7, Capoy 4 (BANAT NEWS)