Basak Tigers, 3-0 na sa Lapu-Lapu City Fiesta Cup

CEBU, Philippines - Nagbangis ang Basak Tigers sa fourth quarter nga maoy gihimo nilang hinagiban paglubong sa Philip Carl team, 97-68 sa Open-C division sa Lapu-Lapu Fiesta Mayor's Cup 2011 basketball tournament niadtong Miyerkules didto sa Lapu-Lapu City basketball gym.

Sa maong kadaugan, ang Basak Tigers ni coach Roger Bergado nagpabiling walay pilde sa tulo niini ka mga duwa.

Igo lang milabaw og usa ka punto ang Basak Tigers sa first quarter, 15-14, hinuon, gikalingawan kini nila'g inat sa mosunod nga duha ka kuwarter sa giya ni kanhi USJ-R Jaguars cager Herbert Arellano aron moposte og 62-52 nga bentaha paingon sa final period.

Uban sa suporta nilang Janpous Geraga ug Rojel Estellore, misulbong og maayo ang labaw sa Basak Tigers diin ilang na-outscored ang Philip Carl sa fourth quarter, 34-16 aron mokulit og laing makabungog nga kadaugan.

Gipangulohan ni Arellano ang kadaugan pinaagi sa iyang 16 puntos, si Geraga mipabuhagay og 15 puntos, samtang si Estellore miambit og 11 puntos.

Ang naparot nga Philip Carl gipangulohan sab ni Edsil Montiman, kinsa mihabwa og 27 puntos. (BANATSPORTS)