UV nakigsawo liderato uban sa SHS

CEBU, Philippines - Yano kaayong miugkat og daog ang University of the Visayas (UV) Baby Lancers pinaagi sa paglubong sa University of San Jose-Recoletos (USJ-R) Baby Jaguars, 85-71, samtang ang Cebu Institute of Technology-University (CIT-U) Wildkittens mitumba sa University of Cebu (UC) Junior Webmasters, 85-77 sa secondary matches sa 11th Cebu Schools Athletic Foundation Inc. (CESAFI) kagahapon didto sa Cebu Coliseum.

Sa laing duwa sa juniors, ang University of Southern Philippines Foundation (USPF) Baby Panthers grabe kaayong nakaduwa, apan ang ilang starting guard nga si Jomari Garianod wala katiwas sa duwa kay na-ejected kini sa katapusang 4:31 sa final period.

Gipukan sa USPF ang mas gagmay nga Don Bosco Technology Center (DBTC) Junior Greywolves sa iskor nga 84-64.

Si Gairanod moserbisyo og usa ka duwa nga suspensiyon karong adlawa batok sa University of San Carlos (USC) Baby Warriors.

Si Gairanod unang gitawagan og technical foul tungod sa paglabyog sa iyang siko ug ikaduha batok ni Stephen Neire, kinsa nahagba human sa hard ug unsportsmanlike foul. Si Gairanod igo lang mi-iskor og dos puntos.

Si Rommel Diapera maoy nangu sa Baby Panthers sa iyang 29 puntos, samtang sila si Jason Cando ug Winston Bolivard nagkumboya og 33 puntos.

Nangu sa Greywolves mao si Niere, kinsa mipugnit og 19 puntos, gisundan nilang Glenn Paul Carbon ug Niño Roel Geraldizo nga mikutlo og 10 puntos matag usa.

Sa sayo pa, si Mark Kong mi-iskor og 20 puntos aron pangulohan ang Wildkittens, kinsa nagtangag og 8-4 nga baraha ug nagtabla sa Baby Panthers.

Si Kurt Ian Trangia maoy kinadak-an og iskor sa Junior Webmasters pinaagi sa iyang 20 puntos.

Lima ka Baby Lancers ang mi-iskor og doubles nga gipangulohan ni Ron Marvis Dennison sa iyang 19 puntos.

Nagtabla sila karon sa unang dapit sa standing uban sa Sacred Heart School-Ateneo de Cebu (SHS-AdC) Magis Eagles sa managsamang 12-1 win-loss records.

Ang 4-9 nga Baby Jaguars gipangulohan ni Ricky Cuyos, kinsa mitira og 29 puntos. (BANATSPORTS)