Panthers gipanitan sa Webmasters

CEBU, Philippines - Gipanitan sa defending champion University of Cebu (UC) Webmasters ang University of Southern Philippines Foundation (USPF) Panthers, 84-63 aron magpabiling walay pilde sud sa siyam ka duwa sa nagpadayong 11th Cebu Schools Athletic Foundation Inc. (CESAFI) basketball event diha sa Cebu Coliseum.

Sama sa miagi nilang tulo ka mga duwa, ang Webmasters padayong nag-eksperimento ug gihatagan gihapon nila og panahon ang ilang second stringers sa pagdala sa duwa hinungdan nga nabiyaan sila og sayes puntos, 15-21.

Wala hinuon kini molungtad og dugay kay nausab ang huna-huna ni coach Roel Gomez ug gipasud niya ang iyang starting unit sa pagpangulo ni 6-foot-9 center June Mar Fajardo.

Tuod man, ang maayong laking si Fajardo mitubag sa tawag ug maoy nangulo sa Webmasters pinaagi sa iyang 25 puntos.

Ang top gunner nga si Robinson Mohammad ug pesky guard nga si Luigi Bercede, mi-iskor sab og double figures sa ilang 14 puntos matag usa.

Ang 9-0 nga Webmasters, kinsa nilabaw og 24 puntos sa nanghinapos nga bahin sa third period, mipagawas sa tanan niyang starters sa katapusang uno minuto ug si coach Gomez mihimo og platoon substitution aron   tahasan ang iyang second stringers pagtiwas sa duwa.

Ang Panthers nga midailos ngadto sa 4-5 win-loss record, gipangulohan ni Earvin Ferraren, kinsa miugkat og 15 puntos.

Sa sayo pa, ang Cebu Institute of Technology-University (CIT-U) Wildkittens miusap sa ilang ikatulong sunod-sunod nga daog sa second round pinaagi sa pag-ihaw sa Don Bosco Technology Center (DBTC) Junior Greywolves, 77-69.

Si Mark Kong mitira og 24 puntos aron pangulohan ang Wildkittens, samtang si Jeraldvin Delma miamot og 20 puntos.

Ang giihaw nga Junior Greywolves gipangulohan sab ni Stephen Niere sa iyang 18 puntos, gisundan nilang Jose Marlo Pono ug Glenn Paul Carbon nga mipaksit og 11puntos matag usa, samtang si Paolo Abelgas milawog og 10 puntos. (BANATSPORTS)