Lopez, Carter nidominar sa 1st NMP Run for Mary

CEBU, Philippines - Mihipos na sab og laing korona ang beteranong runner nga si Mendel Lopez human maghari sa men's 10K class sa 1st NMP Run for Mary niadtong Domingo didto sa Nativity of Mary Parish Church ground sa barangay Canduman, Mandaue City.

Si Lopez, kinsa maoy nanghawod sa Run to Stop TB sa miaging semana, mitapos sa lumba sud sa oras nga 36:12.60, samtang si Jeffrey Batoon mitapos sa ikaduha nga mi-oras og 37:45.02. Si Felix Lopez, mi-okupar sa ikatulo uban sa iyang oras nga 38.08.05.

Sa pikas bahin, ang third placer sa Kawasan Marathon nga si Madelyn Carter mao sab ang nidominar sa women's 10K sa oras nga 42:45.41.

Iyang napuhalan sila si Mary Beboso (43:42.87) ug Rishamae Delecho (44.22.99) nga miangkon sa ikaduha ug ikatulo nga dapit.

Sa 5K run, si Demetrio Rosales mao ang miangkon sa titulo human niya gitapos ang lumba sa oras nga 16:58. Si Rodel Abayon mipahiluna sa ikaduha sa oras nga 18:23, gisundan ni Jay Yosores nga mi-oras og 18:28.

Si Merlita Arias-Dunkin maoy milangkat sa women's 5K title sa oras nga 22:02, samtang si Leonora Martus nalandig sa ikaduha sa oras nga 23:02 ug si Loren Echavez napunta sa ikatulo sa oras nga 22:38.

Sa 3K run, ang top three sa men's division nakuha nila ni Teodulo Beboso, Marlon Beboso ug Johnrey Capuras, samtang sa women's mao sila Crizel Dionson, Lyn Cardenas ug Marcosa Retrosa.

Ang lumba namugna pinaagi sa mga paningkamot ni Raymond Madeja, ang overall chairman sa NMP sports activities uban sa suporta sa NMP Parish Pastoral Council ubos sa liderato ni Jun Alivio ug sa NMP Knights of Columbus GK Jun Verdida.

Nagmalampuson sab kini pinaagi sa dakung suporta sa Timex Phils. Inc., Trial Marketing, EJQ Company, JAK Logistics, Sacred Heart School-Ateneo de Cebu, Jester Stone Furniture, JFCV Trucking ug ang JT Trucking.   - (BANAT NEWS)