SHS-CEC showdown

CEBU, Philippines - Ang walay pildeng Sacred Heart School-Ateneo de Cebu (SHS-AdC) Magis Eagles ug defending champion Cebu Eastern College (CEC) Dragons magsangka sa labing unang higayon niini nga season sa secondary division sa 11th Cebu Schools Athletic Foundation Inc. (CESAFI) basketball season diha sa Cebu Coliseum.

Ang duha parehong nidaog niadtong Domingo diin ang Magis Eagles milubong sa University of Cebu (UC) Junior Webmasters sa iskor nga 94-55, samtang ang Dragons mitumba sa University of Southern Philippines Foundation Inc. (USPF) Baby Panthers, 79-60.

Tinguha sab sa 6-0 nga Magis Eagles nga mobawos sa ilang 70-87 nga kapildihan batok sa Dragons sa miaging tuig ug buling-bulingan ang limpiyong baraha sa ilang kaatbang.

Midaog ang Dragons sa Magis Eagles sa finals sa miaging tuig pinaagi sa three-game sweep nga nahimong usa ka school record, apan ang ubang mga pambato sa Dragons wala na karon sa ilang line-up sama ni MVP Nike Montalvo, Benjamin James Zosa, Mark Olayon ug Roy Vincent Villarias.

Daw sa patas ra sab gihapon kay wala na sa Magis Eagles sila si Adven Jess Diputado, Adrian Muller ug Bradely Bacaltos.

Dili lang kay kulbahinam ang mahimong resulta sa duwa tali sa Magis Eagles ug Dragons, apan interesado sab kaayong nagpa-abot ang University of the Visayas (UV) Baby Lancers ilabi na kay duna sila’y purohan nga makakuha’g best record kun adunay mahitabong triple tie.

Kini tungod kay ang Baby Lancers midaog man batok sa Dragons, 62-47 nga adunay 15 points winning margin, apan napilde sila sa Magis Eagles, 73-79 o may sayes puntos nga biya.

Kinahanglan lang modaog ang Magis Eagles aron mahimong overall leader.

Kung adunay triple tie, ang team nga adunay highest quotient maoy moguwang no. 1 sa first round.

Niadtong Domingo, ang University of San Carlos (USC) Baby Warriors midaog batok sa Cebu Institute of Technology-University (CIT-U) Wildkittens, 70-59 ug ang University of San Jose-Recoletos (USJ-R) Baby Jaguars mibuntog sa Don Bosco Technology Center (DBTC) Junior Greywolves sa iskor nga 85-74.   - (BANAT NEWS)