Cebu Blue Marlins nalandig sa ikatulo

CEBU, Philippines - Naanod sa ikatulo nga dapit sa overall ang Cebu Blue Marlins (CBM) sa first leg sa 2011 Speedo G-League Visayas Area Meet didto sa Dumaguete City.

Ang CBM nga gipangulohan sa University of Cebu (UC) tanker, mao unta ang modaog isip kampiyon human mikabkab og 43 golds, 15 silvers ug 19 bronzes, samtang ang host Silliman University Red Snappers nga igo lang nakatigom og 26 golds, 29 silvers ug 22 bronzes.

Apan, basi sa puntos, ang CBM nihipos lang og kinatibuk-ang 714 sunod sa Silliman University Red Snappers, kinsa miposte og 945 puntos, gisundan sa Negros Oriental Blue Dolphins Swim Club nga adunay 865 points.

Si Aaron Grant Embuscado ug Rommylin Niña mihakot og lima ka gold matag usa, sila si Tristan Kirk Ebon, Michael Ichiro Kong ug Danielle Mae Ballesteros mikubkob og upat ka golds matag usa, samtang sila si Bethmay Arellano, Razel Cabajar ug Trina Cañeda mitunol og tulo ka bulawan matag usa.

Sila si Christine Indaya ug Tiara Kyra Ebon midaog og duha ka bulawan, si Mary Arlette Baller nidaog og duha ka bulawan ug duha sab ka silvers ug usa ka bronze, si Matthew Vincent Vega adunay usa ka gold, silver ug bronze. Si Marvincent Hermoso nidaog og upat ka silvers ug usa ka bronze ug si Langeline Hermoso midaog og duha ka bronzes.

Si Jobert Indaya sa Labangon Elementary School mihatag og tulo ka golds alang sa CBM, samtang ang iyang igsuon nga si Karen Mae adunay upat ka bulawan.

Sa laing bahin, ang impresibong performance ni Embuscado maoy naghatag kaniya og dalan aron maangkon ang Most Outstanding Athlete award. (BANATSPORTS)