Cobras daog na gyud

CEBU, Philippines - Sa kataposan human sa tulo ka duwa, nakatilaw na gyud og daog ang pre-tournament favorite Southwestern University (SWU) Cobras dihang ilang gibaraw ang sagunson nga tulo ka daog sa University of the Visayas (UV) Green Lancers pinaagi sa pag-iskor og 64-56 nga kadaugan kaniadtong sabado sa gabii atol sa nagpadayong 1th season sa Cebu Schools Athletic Foundation, Inc. (CESAFI) didto sa Cebu Coliseum.

Susama sa hulagyway sa miaging duha nila ka kapildehan diin ilang giusikan ang ilang labaw, nahitabo na sab ang pagkulapso sa Cobras dihang ila na sab gilabay ang 15 puntos nga abante sa third period, 40-25 dihang mi-rally ang Lancers pinaagi sa ilang 15-4 run sulod sa siete minutos nga binayloay og ball possessions aron mosikit sa iskor, 40-44, may 1:51 ang oras sa third period.

Hinoon, gitapos ra sab sa Cobras ang third quarter nga may 10 puntos nga abante, 50-40 human sila mosukli ug 6-0.

Dihang nakapanimaho ang Lancers nga nahimutang sa delikado ang ilang three-game run, naningakmot silang mosikit ug usab ug mipabuhagay sila’g 16-6 rally aron tablahon ang duwa sa iskor, 56-all dihang nakapasulod ug three-pointer ang beteranong point guard nga si Harold Cincoflores, may 3:18 ang nahibliing oras sa duwa.

Sa tinguhang dili na mausab ang ilang pagkasukamod sa ikatulong higayon, dali kaayong na-ilog sa Cobras ang labaw dihang mibawos sab ug three-pointer si Bonifacio Guillena Jr. alang sa 59-56 nga abante ug laing tres puntos ang iyang nahimo lakip ang usa ka jumpshot ug split charities gikan sa ikalimang foul ni Edrian Lao aron inaton ang labaw ngadto sa sayis puntos, 62-56 may usa ka minuto na lang ang nahibilin.

Wala na maka-iskor ang Lancers sa kataposang minuto tungod sab sa maayong depensa sa Cobras ug ang ilang 6-6 nga sentrong si Justin Aboude maoy mi-iksor sa kataposang puntos sa duwa alang sa final score nga 64-56.

Si Eleazar Armecin maoy nangu sa Cobras kinsa naghupot na og 1-2 nga baraha samtang si Aboude midugang og 13 puntos.

Silang Guillena ug Rene Pacquiao miposa ug 12 ug 10 puntos matag usa alang sa Cobras.

Ang Lancers gipangulohan ni Abad kinbsa mihakot ug 11 puntos samtang si Cincoflores midugang og 10 puntos alang sa 3-1 nga Lancers.

Nataghapan ang Cobras sa ilang unang duha ka duwa batok sa Warriors ug sa University of Southern Philippines-Foundation (USP-F) Panthers kinsa parehas sab sa Webmasters, naghupot sab ug 2-0 nga baraha.

Puntos matag usa:

SWU (Coll) 64— Armecin 15, Aboude 13, Guillena 12, Pacquiao 10, Nalos 7, Arong 4, Ortuyo 3

UV (Coll.) 56— Abad 11, Cincoflroes 10, Lao 9, Silva 8, Saycon 4, Rios 4, Avillanoza 4, Mendoza 4, Cabañero 2.  - BANAT NEWS