Gasca bag-ong OPBF champion

CEBU, Philippines - Milampos si ALA Boxing Gym fighter Roli Gasca   pagsakmit sa Oriental and Pacific Boxing Federation (OPBF) super bantamweight title dihang iyang gibuntog ang Hapon nga si Hiromasa Ohashi didto sa Aioi Hall sa Kariya, Aichi, Japan.

Nailhan nga usa sa mga ngilngig nga boxing tactician sa ALA, gigamit ni Gasca ang iyang kaiglas aron luyahon ang Hapon gamit ang iyang jab ug body shots.

Misuway pagbawus si Ohashi sa tunga-tungang bahin sa away, apan wala kini makapugong ni Gasca kinsa padayun sa iyang pagpatugpa og mga kombinasyon sa nawung ni Ohashi nga maayong pagkaputos sa bun-og.

Human sa dose ka hugna nga sinumbagay tulo sa mga hurado ang miiskor og 116-112, 116-112, 115-115, tanan pabor ngadto ni Gasca.

Sa maong kadaugan si Gasca mipalambo sa iyang record ngadto sa 17 ka daog, tulo niini gikan sa knockout ug usa ka pilde, samtang si Ohashi nahagsa ngadto sa 24-10 win-loss record.

Si Gasca mao usab ang Pan Asian Boxing Association (PABA) bantamweight king dihang iyang gipatug sa sixth round ang Thai nga si Tabtimdaeng Na Rachawat niadtong Nobiyembre sa miaging tuig.

Si Gasca uban sa mga ALA trainers nga sila si Joseph Baldago ug Edito Villamor ug ni ALA Promotions Director for Marketing and Media Relations Chad Canares miabot sa Cebu kagahapon sa hapon.  (BANATSPORTS)