UV juniors daog

CEBU, Philippines - Tungod sa mas epektibo nilang free throw shooting, nasalbar gikan sa kakuyaw ang University of the Visayas (UV) Baby Lancers aron molampos sa ilang debut dihang ilang gilubong ang secondary defending champion Cebu Eastern College (CEC) Dragons sa usa ka come-from-behind nga kadaugan sa iskor, 62-47 kagahapon atol sa pagsugod sa ika-11 nga season sa Cebu Schools Athletic Foundation, Inc.(CESAFI) didto sa Cebu Coliseum.

Ang Baby Lancers maoy kanunay nabiyaan halos sa kinatibuk-ang duwa ug nabiyaan pa’g 10 puntos sa uwahing bahin sa third period, 35-25 apan gihinay-hinayan nilang kitkit ang labaw pinaagi sa ilang mas hugot nga depensa.

Ang Baby Lancers maoy mi-iskor sa labing unang singko puntos sa fourth period ug ang basket ni Reeve Ugsang maoy naghatag kanila’g labaw sa unang higayon, 43-41. Wala madugay, ang jumpshot ni Joseph Peralta mihatag sab sa UV bantams ug 45-43 nga abante hangtod nga hinay-hinay miburot ngadto sa otso puntos ang ilang labaw 51-43 sa wala pa makabawos ang Dragons human sa taudtaud nga kahilum, 47-51 pinaagi sa basket ni Jefferson Roxas.

Padayong maayo ug agi sa free throw ang Baby Lancers ug ang ilang sagunson nga sayis puntos sa free throw maoy nakapa-inat sa labaw ngadto sa 10 puntos, 57-47 ug dayon ang three-pointer ni Peralta sa may 18.9 segundos ang nahibiling oras, maoy naghatag ug labaw sa Baby Lancers ug 13 puntos hinungdan nagkaguliyang sa kauwahian ang Dragons.

Si Peralta kinsa usa ka niwang nga shooting guard og si Ugsang parehong mibahug ug 13 puntos alang sa Baby Lancers. Si Peralta sab maoy naghatag sa Baby Lancers sa kinadak-ang labaw, 62-47 nga maoy final score.

Si Ron Marvis Dennison kinsa kabahin sab sa mainitong rally sa Baby Lancers sa fourth period, midugang ug 12 puntos.

Sa miaging tuig, ang Dragons midaog dayon sa ilang debut batok sa Sacred Heart-Ateneo de Cebu Magis, 87-70 apan nagduwa pa ang MVP nga si Nike Montalvo ug ang abtik nga point guard nga si Benjamin James Zosa kinsa mitabang sa CEC alang sa usa ka makasaysayanong title run.  - BANAT NEWS