Dodie Boy Jr. milampos

CEBU, Philippines - Wa pakyasa ni undefeated prospect Dodie Boy Peñalosa Jr. ang iyang mga fans dihang milampos siya pagpukan sa labing una niyang langyaw nga kaatbang nga si Thai Kong Kiatpracha Gym sa main event fight sa "Laban ng Lahi: Dugong Kampeyon" sa miaging gabii didto sa Mandaue Sports Complex.

Ang 21-anyos nga anak ni kanhi two-division world champion Dodie Boy Sr. ug pag-umangkon ni Gerry Peñalosa, mirehistro sa ikaunom nga sunod-sunod niyang kadaugan, tanan pinaagi sa knockout.

Migawas nga agresibo si Dodie Boy Jr. sa unang duha ka round dihang kapila niya gisuwayan pag-korner si Kiatpracha kinsa nagsalimuang pagpanagang sa atake sa Pinoy boxer.

Gamit ang iyang kiwaw nga fighting style, misuway pagpaigo og mga wild hooks si Kiatpracha apan na-counter kini ni Dodie Boy Jr. sa iyang mga body shots nga maoy mipaluhod sa Thai boxer sa 2:16 sa third round.

"Magaling, sumbagay gyud iyang (Dodie Boy Jr) gipakita ug naa gyud siyay kusug, pero daghan pang kinahanglan makat-onan ug tentatively sa September i-away nako siya og balik against an Australian boxer nasad," matud pa ni former boxing champion ug karon boxing promoter Gerry Peñalosa.

Sa maong kadaugan mihayag usab ang luna ni Dodie Boy Jr. sa undercard sa Manny Pacquiao-Juan Manuel Marquez showdown sa Nobiyembre 12 didto sa Las Vegas.

Sa supporting bout, midaog pinaagi sa unanimous decision si Rodel "Batang Mandaue" Mayol batok ni Jason Rotoni sa Manila, samtang si former two-time OPBF king Jimrex Jaca mipahunong ni Philip Jun Demecillo sa round 3.

Ang come backing nga si Eden Sonsona midesisyon usab ni Eman Labanza, samtang nadepensaan ni Randy Petalcurin ang iyang PABA interim light flyweight title sa usa ka kontrobersiyal nga eight round disqualification batok ni Michael Rodriguez.  - BANAT NEWS