Caligdong 'di pa sumusuko
MANILA, Philippines - Hindi pa isinusuko ni Chieffy Caligdong ang laban para sa Pilipinas.
“Hindi pa tapos ang laban, may malaking chance pa tayo,” sabi ni Caligdong sa kabila ng 0-3 kabiguan ng Philippine Azkals sa Al Azraq ng Kuwait sa first leg.
“Makikita naman sa lahat ng players na gustong manalo, gustong pumunta sa next round,” sabi ng veteran Ilonggo na sadyang sumama ang loob matapos ang kanilang pagkatalo at walang kinausap na tao sa kanilang post-game dinner diretso sa kanyang hotel room.
Sa second leg na idaraos sa Rizal Memorial Football Stadium, lumakas ang loob ni Caligdong na makakasabay ang Azkals laban sa Al-Azraq.
“Hindi kami nawawalan ng pag-asa sa home game. Kakayanin namin ang lahat, hindi lang para sa amin kundi para na rin sa lahat,” sabi ni Caligdong.
Inaasahan pa rin ni Caligdong na gagawin ng Kuwait ang lahat para manalo.
Si Caligdong ang unang umiskor para sa Azkals sa kanilang panalo sa Mongolia noong Pebrero sa AFC Challenge Cup playoffs at kontra Sri Lanka sa first round ng FIFA World Cup Asian Qualifiers noong Hunyo.
- Latest
- Trending
