Calvin Abueva "Player of The Week"
CEBU, Philippines - Si Calvin Abueva, ang power forward sa San Sebastian College (SSC) Stags sa NCAA, maoy napiling ACCEL-316 NCAA Press Corps “Player of the Week”.
Dihang wala makaduwa si Abueva tungod sa one-day suspension, naglisod og daog ang Stag batok sa Jose Rizal University (JRU) Heavy Bombers atol sa pagbukas sa 87th NCAA men’s basketball tournament kaniadtong Hulyo 2 didto sa Araneta Coliseum.
Sa pagbalik ni Abueva og duwa, yano kaayong midaog ang Stags batok sa Perpetual Help Altas sa iskor, 87-60 sa miaging Lunes.
Niadtong duwaa, ang 6-foot-3 nga player gikan sa Pampanga mihimo’g career-high 31 puntos ug milangkat sab siya’g siyam ka rebounds uban sa pito ka assists.
Ang nakasamot sa pagka-impresibo sa iyang duwa mao ang iyang matang sa opensa diin mihatag siya’g higayon sa iyang mga kauban nga makasalmot sab sa opensa ug nag-average siya’g 6.5 assists karon nga season.
“I want to maximize Calvin’s potential,” matod pa sa rookie coach sa Stags nga si Topex Robinson kinsa mitug-an nga importante kaayo si Abueva sa ilang team.
Nag-average si Abueva og 23 puntos ug 13 ka rebounds per game sulod sa miaging duha ka duwa sa Stags. - BANAT NEWS
- Latest
- Trending
