MLKP- Cebu Niños vs MisOr Meteors sa Liga Pilipinas finals

CEBU, Philippines - Subli na usab nga mag-abot ang mortal nga magkaatbang nga M.Lhuillier Kwarta Padala Cebu Niños ug Misamis Oriental Meteors aron ilogan ang titulo sa SMC Liga Pilipinas Conference V.

Kini dihang gibuntog sa Meteors ang top-seeded Cebu Landmasters-RDAK Mandaue, 70-63, sa ilang sangka sa katapusang adlaw sa elimination sa Super Leg niadtong miaging gabii didto sa Xavier Gym sa Cagayan De Oro.

Ikaupat kini nga higayun nga ang Niños ug Meteors ang magsangka sa National Championships, diin ang Meteors misakmit sa titulo sa second conference sa Liga, samtang ang Niños mituhog sa duha ka sunod-sunod nga titulo.

Ang kanhi Adamson University (AdU) Falcon nga si Ken Bono maoy nangulo sa MisOr batok sa Mandaue sa iyang 14 puntos, samtang si Dino Daa ug Egay Billones mitampo og 10 ug nuybe puntos matag usa.

Sa sayu pa, gikompleto sa defending champion Cebu Niños ang usa ka 4-0 sweep sa Super Leg diin katapusan nilang gibiktima ang Laguna Golden Lions, 90-82.

Sa laing bahin, ang Liga Pilipinas conference individual awards gibitoonan ni Glen Bolocon sa Laguna nga maoy MVP, samtang si coach Jun Tan sa Mandaue maoy coach of the conference ug si Mark Magsumbol maoy midawat sa sportsmanship award.  - BANAT NEWS