Ansag tinguha og luna

CEBU, Philippines - Paninguhaon sa Sugbuanong si Luis Ansag nga makakuha'g balik og luna sa Philippine wrestling team sa dihang siya moduwa sa National Senior Wrestling Championships karong Hulyo 29-30 didto sa Manila.

Ang kompetisyon duwaon sa duha ka binyu. Ang Greco-Roman competition adto himuon sa Activity Center sa Mall of Asia isip kabahin sa Adidas Martial Arts Festival, samtang ang freestyle nga maoy giapilan ni Ansag adto himoa sa Rizal Memorial Sports Complex.

Magsilbe kining final qualifying round alang sa mga representante sa nasud ngadto sa 2011 Southeast Asian Games sa Indonesia.

Si Ansag nakakuha na og mga medalya alang sa Pilipinas sa mga international competitions sa wala pa siya mobiya sa nasud alang sa iyang hamubo nga pagpuyo didto sa Canada pipila ka tuig ang nakalabay.