Paboksing sa Barangay sa Guadalupe

CEBU, Philippines - Sa ikaduhang higayon, mopahigayon na sab og "Paboksing sa Barangay" ang Amateur Boxing Association of the Philippines (ABAP)-Cebu Chapter ubos sa pamunoan ni Lorenzo 'Chao' Sy.

Ang nahisgutang paboksing nga libre sa publiko adto ipahigayon sa barangay Guadalupe duol gyud sa simbahan.

Dose ka paresan ang mopakita sa ilang abilidad.

Ang torneyo nga giuloha'g "ABAP Cebu Mayor's Cup Paboksing sa Barangay," himuon kaduha sa usa ka bulan agi'g tabang sa ABAP-Cebu Chapter pagdiskubre og mga dekalibreng boksidor nga ipadala didto sa national training pool aron pagtuman sa damgo alang sa unang gold medal sa Olympics.

Ang mopakita sa ilang abilidad mao sila si Gerwin Singson sa Compostela batok Joshua Francisco sa Omega Boxing Club, Rhezon Tarona sa Phil-Aust Boxing Club batok Kitseron Garces sa Sta. Cruz Boxing Club, Christian Pareja sa Compostela batok Rodex Piala sa Team Cebu City, Raymund Namucatcat sa Team Cebu City batok Ernie Alesna II sa Toledo City, Axel Cabahug sa Lapu-Lapu City batok Ruel Sumabong sa Rex Wakee Salud Stable, Edu Rosal sa Phil-Aust Boxing Club batok Cherwelan Cantel sa Mandaue City, Allan Refuella sa Team Cebu City batok Wedndell Echeron sa Mandaue City.

Makigsinukliay sab og kumo si Jerry Castroverde sa Omega Boxing Club batok John Kenan Vilaflor sa Team Cebu City, Clifford Loreto sa Omega Boxing Club batok John Rey Melligen sa Mandaue City, Elmo Traya sa Mandaue City batok James Castil sa Team Cebu City, Cadong Pepito sa Compostela batok Alvin Remandeman sa Mandaue City ug Raymund Peñalosa sa Team Cebu City batok Hiroshi Lubosta sa Phil-Aust Boxing Club. (BANATSPORTS)