Cebuano darters misidlak sa Maasin

CEBU, Philippines - Gidominar sa mga Sugbuanong darters ang 1st Southern Leyte Governor's Cup Darts Tournament didto sa DPWH Conference Room sa Maasin City dili pa lang dugay.

Ang batang Davao, apan karon ania na magbasi sa Sugbu nga si Yoko Quillope naghari sa singles event batok ni Melvin Pelona, samtang si Roy Laude sa LTFRB-Cebu ni-okupar sa ikatulo human niya gipilde si Ralph Veloso.

Laing Sugbuanong darter nga si Odong Pamatian mikapyot sa ikalima nga dapit uban nilang Epoi Facundo, Melton Uy ug Butch Solidor nga maoy mikompleto sa top eight finishers.

Si Laude, kinsa napakyas paglangkat sa singles title nidaog sa doubles uban ni Tom Londina. Ilang gipilde ang tandem nilang Veloso ug Kaju Mullet. Duha ka Sugbuanon nga sila si Pamatian ug Gil Arco nalandig sa ikatulo.  (BANATSPORTS)