Red kampiyon sa Abbariao Cup

CEBU, Philippines -  Ang batan-ong sakop sa Customs Police nga si Boodie Monteño mihimo'g double-double performance pinaagi sa pag-iskor og 10 puntos ug mihimo'g 10 ka assists aron baswaton ang Red Teams ngadto sa impresibong 77-62 nga kadaogan batok sa Green Team ug milangkat sa korona sa 1st Major Alfonso C. Abbariao Memorial Cup basketball tournament kaniadtong Miyerkules sa gabii didto sa Benedicto College gym sa dalan A.S Fortuna sa Banilad, dakbabayan sa Mandaue.

Si Monteño kinsa maoy mi-iskor sa unang singko puntos sa Red aron tubagon ang sagunson nga singko puntos gikan ni Jingjing Rama alang sa Green sa 5-all, maoy miduslit sa 10-0 run alang sa Red pagsugod sa second half dihang mihulga unta sa pag-rally ang Green ug miposte pagbalik og double-digit nga abante sa iskor, 49-38.

Misamot kahayag ang kadaogan sa Red dihang wala makatiwas pagduwa si Rama alang sa Green tungod kay napiang ang iyang tuong tikod sa naghinapos na ang duwa human siya mobahug og 29 puntos. Mosuway unta pag-jumpshot si Rama apan kalit napilo ang iyang tikod ug misikit na unta pagbalik ang Green, 56-64. Migawas si Rama ug gihumol ang iyang tikod sa usa ka ice bucket.

Sila si Dondon Dejarasco ug Elmer Bailio mi-abag unta ni Rama aron pagpahigayon sa rally sa Green diin silang tulo ang nagkumboya og 14 puntos alang sa ilang team ilabi na dihang gitawagan og technical foul si Morre Velez sa Red tungod sa delaying the game alang sa iyang ikalima ug kataposang foul.

Si Adam Mose kinsa usa ka Customs Police maoy nangu sa opensa sa Red sa iyang 17 puntos samtang sila si Ronan Cañete ug Bryan Rabago parehong midugang og 16 puntos matag usa.

Si Rama kinsa maoy scoring leader sa maong torneyo, mibahug og upat ka three-pointers lakip ang talagsaong four-point play.

Si ex-pro ug kanhi UV Lancer Bonel Balingit, ang gitawag og "Gentle Giant" gikan sa Kapatagan, Lanao del Norte, maoy dinapit aron molamas sa championship game diin nagsige siya'g posing alang sa usa ka pictorials uban sa champion team ug sa second placer.

Si Capt. Jerry Arizabal, ang hepe sa Cebu Customs Police maoy midawat sa championship trophy.

Sa sangka sa ikatulong pwesto, midaog ang Yellow Team batok sa Blue Team diin miposa og 16 puntos si Mactan Collector Bingo Matugas aron mo-iskor og 64-53 nga kadaogan batok ni District Collector Atty. Ronnie Silvestre.

Mi-iskor sab og 16 puntos si Mamasao Capalan alang sa Yellow ug si Jojo Quinio midugang og 10 puntos. 

Sila si Rizzan Herbito ug and Chito Manahan pareho sab mihakot og 16 puntos matag usa alang sa Blue.

Puntos matag usa:

First Game:

Yellow (64) —Matugas 16, Capalan 16, Quinio 10,Datu 8, Laraga 6, Remonde 6,

Blue (53)— Herbito 16, Manahan 16, Mabalo 6, Silvestre 4, Macatangay 4,Barte 4 Halftime: 37-24

            Second Game:

Red (77)—Mose 17, Cañete 16, Rabago 16, Monteño 10, Nadal 6, Cabrera 5, Velez 3, Cabahug 2, Vandam 2

Green (62)— Rama 29, Dejarasco 11, Abellana 8, Bailio 5, Apuya 6, Dalucapas 2 Halftime: 39-36 (BANAT NEWS)