Duenas, Tabal nanghawod sa Mandaue City 4th Mayor's Cup Run

CEBU, Philippines - Giila nga labing paspas modagan sila si John Philip Duenas ug Mary Joy Tabal dihang ilang gidominar ang tagsa-tagsa ka dibisyon sa Mandaue City 4th Mayor's Cup Run niadtong Domingo didto sa Parkmall.

Ang garbo sa Danao City nga si Duenas maoy naghari sa 12K men's open human niya gitapos ang dagan sa oras 39:48, nag-una lang og siyete segundos batok sa second placer nga si Mendel Lopez, kinsa mi-oras og 39:55. Si Arnold Unabia maoy mi-okupar sa ikatulo sa oras nga 40:36.

Sa laing bahin, ang rising teen running sensation nga si Tabal, padayong mipakita sa iyang abilidad sa dagan aron makuha ang korona sa 12K women's open. Gitapos niya ang lumba sa oras nga 47:11. Sila si Madelyn Carter (52:20) ug Leonora Martus (59:57) mipahiluna sa ikaduha ug ikatulo nga puwesto.

Sa 12K Master A, si Tomas Nuñez maoy migawas nga kampiyon sa iyang oras nga 49:01, nagsunod alang sa ikaduha ang manager sa Lexmark Research-Ayala nga si Chris Burdette sa oras nga 49:15 ug natugpa sa ikatulo si Fernando Lubas nga mi-oras og 50:16.

Ang top three finishers sa Master B mao sila si Ruth Banzon (50:00), Eleazar Oporto (51:11) ug Marcos Pelare (53:28).

Sila si Dandy Maturan ug Lynle Cardenas mao ang nanghawod sa tagsa-tagsa nila ka dibisyon sa 6K Inter-barangay.

Si Maturan maoy naghari sa men's division, samtang si Cardenas sa women's class.

Nagsunod ni Maturan mao sila si Harold Estrada ug Rolan Bontiancila. Sila si Clarisse Diongson ug Cecilia Cabahug miangkon sa ikaduha ug ikatulo nga dapit.

Sa 3K Inter-barangay boys, si Kenneth Nier mao ang migawas nga labing paspas, gisundan ni Andrie Bolambo ug Mico Quizon. Mikompleto sa top five mao ang anak ni race director Arkel Nodalo nga si Jacob Nodalo, 11-anyos ug ingon man ang apo niining si Julius Ceasar Bono, 7-anyos.

Samtang sa 3K Inter-barangay girls, si Mary Joy Loberanis maoy nag-una, gisundan nilang Christine Nicole Pacaña ug Lalyn Cardenas alang sa ikaduha ug ikatulo nga dapit.

Ang lumba nga usa sa mga highlights sa kapistahan sa Mandaue City karong Mayo 8, gipasiugdahan sa Mandaue Runners Club (MRC) sa liderato ni Arkel Nodalo sa abag sa ilang secretary Doris Nodalo. Gisuportahan sab kini sa Mandaue City Sports Commission (MCSC) sa pagpangulo ni Atty. Hidelito Pascual. (BANAT NEWS)