2 Dikit sa Gems

MANILA, Philippines - Sinelyuhan ng Cebuana Lhuillier ang pagiging team to beat nang durugin nila ang dating walang talo na FCA Cultivators, 80-58, sa PBA D-League Foundation Cup kahapon sa San Juan Gym.

May 20 puntos at 11 rebounds si Allein Maliksi habang tatlong iba pa ang naghatid ng mahigit na 10 puntos para sa Gems na nagpakawala ng 23-6 bomba matapos lumayo ang Cultivators sa 35-41, para kunin ang momentun na hindi binitiwan hanggang sa matapos ang sagupaan.

Ito ang ikalawang sunod na panalo ng tropa ni coach Luigi Trillo para makasalo sa lideratong tangan ng Cobra Energy Drink sa Group B.

Binuksan nga ng Gems ang huling yugto gamit ang 6-0 bomba at ang pinakamalaking kalamangan sa laro ay sa 23 puntos, 64-47, sa jumper ni James Sena.

Bago ito ay bumangon naman buhat sa huling kabiguan ang NLEX Road Warriors sa pamamagitan ng 87-72 panalo sa RnW Pacific Pipes sa unang laro.

Sinandalan ng Road Warriors ang pitong tres na pinakawalan sa first half para tanganan ang 53-36 bentahe, bagay na hindi na nakayanan balikan ng Pacific Pipes para sa 2-1 karta ng bataan ni coach Boyet Fernandez.