Pito ka teams mopakita'g aksiyon sa 5th CESAFI Partner's Cup

CEBU, Philippines - Pito ka teams nga gipaluyohan og lain-laing corporate sponsors ang mosalmot sa 5th CESAFI-Partner’s Cup nga sugdan na karong Sabado, Abril 2 diha sa Cebu Coliseum.

Pangulohan kini sa defending champion Ave Maria Sanctuary Park-USJR, Winner Beef Loaf-CIT, Prime Asia-USC, San Marino Corned Tuna-SWU, Lion-Tiger/Aerosol-UV, Rose Aquarius Merchandising-USPF ug Gaisano Capital-UC.

Mosalida dayon sa opening day ang Gaisano Capital ug ilang sangkaon ang Winner Beef Loaf, mosunod ang duwa tali sa Lion Tiger Aerosol ug San Marino Corned Tuna, samtang sa main game ang Prime Asia makigbatok sa defending champion Ave Maria.

Ang barangayan system maoy gamiton sa unang duha ka rounds. Inig sugod sa second round, mahimong maka-ilis ang   teams og bag-ong players nga kwalipikado sab sa CESAFI.

Ang top four teams mo-abante ngadto sa quarterfinals ug mag-abot na sab sa laing single round robin series diin ang top 2 teams maoy mag-abot sa best-of-five championship series.

Ang kampiyon makadawat og P30,000, ang second placer makaangkon og P20,000, ang third placer mobulsa og P10,000 ug ang fourth placer makadala og P5,000. - BANAT NEWS