Kernn Sesante: Player, Customs Broker ug umaabot sab nga bar topnotcher?

CEBU, Philippines - Niadtong miaging Biyernes, Marso 18, migadwar sa kursong Law o abogasiya ang kanhi point guard sa University of Cebu (UC) Webmasters nga si Kernn Sesante didto sa Cebu International Convention Center (CICC) ug walay bisan usa nga dili mapasigarbohon sa iyang nahimong kalamposan isip Cum Laude ug class salutatorian sa UC College of Law ubos sa ilang Dean nga si Atty. Baldomero C. Estenzo kinsa mao sab ang team manager sa UC.

Si Sesante maoy skipper sa Webmasters dihang mi-abante sa labing unang higayon ang UC sa Cebu Schools Athletic Foundation, Inc. (CESAFI) finals batok sa University of the Visayas (UV) Green Lancers niadtong 2005 season. Sayud kitang tanan nga dili tiaw ang kinabuhi sa usa ka varsity player nga kanunay hago sa training sa actual game apan tungod sa paningkamot ni Sesante, nahimo niyang pagbalanse ang basketball ug ang academic nga talagason kaayong hiyas sa usa ka tawo. Kung sa panultihon pa kining si Sesante usa ka “rare specie”.

Dihang migradwar si Sesante sa UC sa kursong Customs Brokerage, nahimo siyang board topnotcher diin siya maoy misakmit sa ikaduhang pwesto sa National Licensure exam aron hatagan og dakong dungog ang UC. Gani hangtod karon sa gate sa UC main ug sulod sa Cebu Coliseum, ang regular venue sa CESAFI, makita ang mga dagkong tarpaulin nga dunay hulagway ni Sesante.

Dili ako mahibulong kung sa higayon nga mokuha si Sesante sa bar exam, molandig sab siya sa Top 10. Sa kasamtangan, ang iyang pulang Nissan Sentra posibleng ma-ilisdan na unya og Toyota Corolla ug kung may swerte pa gani, usa ka Fortuner ang iyang madawat nga ganti gikan kang UC president Atty. Augusto W. Go.

Nabatasan na ni Atty. Go nga iyang premyohan og kotse ang bisan kinsay estudyante sa Law nga molandig sa Top 10 sa bar exam ug sumala sa akong nahibaw-an nga sa ubang kurso, ang mga estudyanteng molandig sa Top 10, uli-an pa gani sa ilang tuition fees.

Sa pagka karon, ang batan-ong Sesante nanag-iya na sab og Customs brokerage ug pabilin gihapon siyang yano nga pagkatawo bisan sa iyang kahimtang.

Matod pa ni Sesante nga wala gyud unta siya’y laraw nga mag-abogado tungod kay ang pagduwa sa Philippine Basketball Association (PBA) maoy iyang childhood dream apan napapas ang maong damgo dihang namatay ang iyang amahan nga si kanhi police colonel Atty. Napolen M. Sesante.

Nakahukom siyang mag-abogado ug kini tungod sa tulo ka dagkong rason.

Una, tungod kay iyang gitan-aw nga usa ka halangdon nga profession ang usa ka abogado, ang ikaduha tungod kay may kalabotan kini sa iyang negosyo ug ang ikatulo tungod kay gusto siyang mosunod sa tunob sa iyang amahan nga abogado sab. Gawas sa iyang amahan, naghisgot sab si Sesante og duha ka inilang personalidad nga nakatampo og dako sa iyang pagpaningkamot ug maoy iyang inspirasyon ug kini naglakip kang boxing champion Manny Pacquiao ug sa usa ka author nga si Zig Ziglar kinsa mitumbok ug mipahimug-at sa gahum sa “positive thinking”.

Daan na gyud mahiligon sa basketball si Sesante ug sa iyang paka-varsity player, nakaduwa sab siya’g commmercial tournament diin usa siya sa mga players sa Jaz Cola King ubos ni coachRoel Gomez sa wala pa ma-undang ang Cebu Basketball Federation (CBF) nga gitukod sa mga inilang sports leaders ug patrons nga Sugbuanon sama kanilang Jack Huang, ang founding president, Lito Gillamac nga nahimo sab nga CBF president ug sila si Albert Tan ug Pio “Junpi” Castillo.

Wala man niya makab-ot ang pagduwa sa PBA nga maoy labing taas nga level sa usa ka basketball player, laing dalan karon ang iyang gisubay.

Mapasalamaton kaayo si Sesante kang Atty. Go tungod sa pangtanyag og scholarship program ug mapasalamaton sab siya nilang Atty. Estenzo ug sa iyang assistant Dean nga si Atty. Paul Yabao tungod sa ilang maayong paggiya aron mahisubay sila sa maayo ug tul-id nga dalan aron maoy angay'ng subayon ngadto sa kalamposan.

Miscellaneous. Congrats to MJDL and Pimentel Brokers for winning their respective games of the CCUPA basketball tournament last Saturday at the Cogon Ramos gym.