Mayorga giparetiro ni Cotto

CEBU, Philippines - Human niya gikaon ang tanang pagpanghudlat ug pagbugal-bugal gikan ni Nicaraguan Ricardo Mayorga, mibawus si Puerto Rican champion Miguel Cotto pinaagi sa pagkulata ni Mayorga atol sa ilang WBA light middleweight showdown kagahapon didto sa MGM Grand Garden Arena sa Las Vegas .

Pulos mibato sa ilang mga makusug nga kumo ang duha ka boksidor, apan ang nakalahi mao nga mas napasulod og kumo si Cotto itandi sa mas edaran ug hinay nga si Mayorga.

Nakabantay nga lubong na kaayo siya sa scorecard, kalit lang nag-wild si Mayorga sa final period, apan naunay na hinuon siya human maigo sa mga mga counter hook ni Cotto nga maoy mipaluhod sa 37-anyos nga boksidor.

Wala nalang tiwasa ni referee Robert Byrd ang pag-ihap ni Mayorga, human ang nauwahi misenyas na nga maglisud na siya pag-away tungod sa pagkabali sa iyang tudlo.

“I’m going to retire. I think I need to look for a job. I said at the start of the promotion that I would retire from boxing if I lost,” matud pa ni Mayorga. “Miguel Cotto hits very hard but that doesn’t scare me.”

Sa maong kadaugan, mitumaw karon ang posibilidad sa usa ka rematch tali ni Cotto ug sa kanhi niyang mortal nga karibal nga si Mexican Antonio Margarito. - LPM gikan sa AP