Banal mag-train sa Estados Unidos

CEBU, Philippines - Gilihok na sa ALA Promotions ang ilang obligasyon aron mapadala si AJ 'Bazooka' Banal ngadto sa Estados Unidos diin adto kini mag-ensayo ubos ni trainer ug kanhi world champion Roberto Garcia.

Giangkon ni ALA Promotions president Michael Aldeguer nga ipaubos ang ALA knockout artist nga si Banal sa training ubos ni Garcia, usa sa mga ngilngig nga trainer karon.

Ang Mehikanong si Garcia mimugna karon og dakung kasikas sa kalibutan sa boxing human niya gituboy sa kadaugan sila si WBO/WBC bantamweight champion Nonito Donaire Jr. ug WBA lightweight titlist Brando Rios.

Matud ni Aldeguer nga daku og matabang alang sa batan-ong karera ni Banal ang pag-train ubos ni Garcia aron madugangan pa ang iyang kaalam ug abilidad nga maoy iyang gamiton sa pagpadayon sa iyang misyon nga mahimong world champion.

Si Banal gikatakdang mobalik sa ring karong Marso 19 batok ni Tanzanian   Francis Miyeyusho diha sa Waterfront Cebu City Hotel and Casino sa main event double-header sa "Pinoy Pride 4: Philippines vs. World." (BANATSPORTS)