Hapee Online training camp sugdan Abril 4

CEBU, Philippines - Sugdan karong Abril 4 ang tinuig nga Hapee Online Basketball Training Camp diha sa barangay Cogon Ramos Gym.

Ang training camp bukas ngadto sa mga bata nga nagpangedaron og 6-anyos pataas.

"We have new updated training camp this summer with 1st level of basic and fundamentals. We have the skills drills challenge every week and win a prize," matud pa ni training director Mark Tallo.

Mapasigarbuhon kaayo si Tallo, kinsa nangangkon nga ang Hapee training specialist nakamugna na og mga maayong produkto nga basketball players nga nagduwa karon sa nagkadaiyang mga torneyo dinhi sa Sugbu ug sa Manila. Ang ilang mga produkto nagduwa sa CESAFI, NCAA ug sa UAAP.

Si Tallo pagaabagan sa iyang anak nga kanhi Junior NBA MVP, CESAFI MVP ug Talk N’ Text MVP nga si Mark Jayven Tallo.

Ang batan-ong Tallo gikatakda nga adto na moduwa sa Ateneo Blue Eagles ug mouban sa team atol sa pagbisita niini didto sa Dubai karong Abril.

Adunay libreng upper jersey ug usa ka basketball nga maoy gamiton alang sa training.

Sa dugang mga kasayoran, niadtong mga interesadong mosalmot mahimong mokontak ni Tallo sa numero 418-1542, 09228864781, 09105576443 o di ba hinuon sa Hapee Online Basketball Camp sa Facebook. (BANATSPORTS)