Ano-os mipaundang ni Larawan sa round 3

CEBU, Philippines - Midaog pinaagi sa referee stoppage ang pambato sa Lilo-an nga si Rick Ano-os batok ni Boy Larawan sa Talamban sa 2011 Summit Natural Drinking Water Amateur Boxing Series didto sa Gaisano Countrymall carpark sa Brgy. Banilad, ning syudad.

Puwerteng nagkasinukliay og kumo ang duha ka boksingero sa unang-duha ka round, apan naangkon ni Ano-os ang kadaugan sa third round human makaangkon og injury si Larawan.

Pulos usab midaog ang mga boksidor gikan sa University of the Visayas (UV) nga sila si Danlou Codilla ug Christian Apawan.

Gimakmak ni Codilla si Sherwin Caday sa Sanai Stable, samtang si Apawan midaog sa puntos batok ni Rodel Wenceslao sa Phil-Aust Boxing Club (PABC). Nasugamak usab ang teammate ni Wenceslao nga si Ryan Cagatulla, apan nidaog pinaagi sa decision sila si Jobert Cabaluna ug Jeffrey Estella. Si Cagatulla nakulatahan ni Mardy Moa±a sa Camotes, samtang sila si Cabaluna ug Estella mibun-og nila ni Gabriel Besinga sa Banilad ug Jegmark Longakit.

Mikompleto sa mga boksidor nga midaog mao sila si Margarito Moya sa Sanai, Reoxyl Tabogon sa Cabancalan, Benjie Rellon sa Pardo, Warren Cagumba sa Pit-os, Ritchie Montealto sa Consolacion ug Jeffrety Depareine sa Lapu-Lapu.  - BANAT NEWS