Rulls Bakeshop, AJY-Bong mikulit og daog

CEBU, Philippines - Nakatagamtan na usab og tam-is nga kadaugan ang Rulls Bakeshop dihang ilang gilumsan ang league-leader VKK Divers, 82-76 sa LLBA-Rollway Cup basketball tournament didto sa Villas Magallanes gym sa Lapu-Lapu City.

Miposte sab og daog ang AJY-Bong ni team owner Allan Yu batok sa Solmeat ni Leo Bascon sa iskor nga 76-71 sa pagpangulo ni Tata Bardago, kinsa mi-iskor og 14 puntos.

Sa makausa pa, si Kit Inso maoy bida sa kadaugan sa Rulls Bakeshop nga mihaon og 19 puntos, gisundan ni Eddie Alian nga adunay 18 puntos, samtang si Allan Sepe milunod og 16 puntos.

Sila si Buldog Ybañez ug Mark Lucas nga parehong miposa og 14 puntos maoy nangulo sa pilderong VKK Divers. Si Sammy Lapoja miamot og 12 puntos sa maong kapildihan.

Sa laing bahin, maayo unta nga nakaduwa si Jerome Plarisan dihang mirehistro kini og 21 puntos, apan nausik lang ang iyang mga paningkamot kay wala kini makatabang pagpadaog sa iyang koponan. Si Jonathan Lazarraga migaling og 15 puntos ug si Diego Tampus misansan og 14 puntos.

Ang maong kompetisyon gipaluyohan sab ni Rolly de la Pieza ug sa JB Sportswear. (BANATSPORTS)