Catmon miyukbo sa USPF sa Shakey's G-League

CEBU, Philippines - Bisan pa sa ilang kalinghod, ang Catmon elementary belles nakapakita gihapon og maayong duwa batok sa ilang   high school nga karibal dihang milahutay pa kini ngadto sa tulo ka sets sa wala pa sila miyukbo ngadto sa defending champion University of Southern Philippines Foundation (USPF) sa pagsugod sa 8th Shakey's Girls Volleyball League kagahapon didto sa Aznar Coliseum.

Giangkon sa USPF ang first set, 25-16, apan ang Palarong Pambansa grandslam champion Catmon spikers, kinsa mihimo og kasaysayan isip unang koponan sa elementary nga miapil og dakung kompetisyon sa high school, mibawos uban ang ilang kaigmat aron modaog sa second set, 16-25 nga mihatod sa duwa ngadto sa desisyon.

Ang batan-ong Catmon spikers padayon mipakita sa ilang talagsaong abilidad sa third set, apan ang ilang pakigbisog napugngan sa USPF hinungdan sa ilang kapildihan, 25-20.

Sa laing bahin, ang University of San Jose-Recoletos (USJ-R) Jaguars spikers gisugat sab og daog batok sa Colegio de la Inmaculada Concepion (CIC)-Mandaue sud sa straight sets, 25-15, 25-15.

Mikompleto sa mga partisipanteng koponan mao ang Paref-Southcrest, University of San Carlos (USC), Abellana National School (ANS), Liloan National High School ug Don Gerardo Ouano Memorial National High School.

Ang kampiyon maoy morepresentar sa region alang sa Shakey's G-League National Finals karong Abril 4-9 didto sa University of St. La Salle-Bacolod sa Bacolod City. (BANATSPORTS)