Violet naka-eskapo sa Yelllow
CEBU, Philippines - Daw sa naibtan og tunok ang team Violet dihang naka-eskapo uban ang 85-84 nga kadaugan batok sa team Yellow sa laing yugto sa Phase 3 Camella Homes Sunday Club basketball tournament didto sa Villas Magallanes gym sa Sta. Lucia Property, Lapu-Lapu City.
Puwerteng sikita sa aksiyon ug pinugnganay gyud sa husto ang gipakita sa duha ka kampo hinungdan nga nagligas lang kini og uno punto paghuman sa duwa pabor sa Violet.
Si Ramil Cortes mao ang nangulo sa Violet nga mikadlit og 22 puntos, gisundan ni Centes Brañanola pinaagi sa iyang 21 puntos.
Sila si Rolly de la Pieza ug Amistad mitikdol og 11 puntos matag usa alang sa maong kadaugan.
Sa gihapon, si Amay Palad mao ang nangulo sa naparot nga Yellow team pinaagi sa iyang 30 puntos.
Laing tulo ang mi-iskor sab og double figures. Si Alan Sepe mitimbre og 19 puntos, si Jun Geraldez mitikdol og 14 puntos ug si Alex Balberona miariya og 11 puntos.
Ang torneyo sa Sunday Club gipaluyohan sab sa Rollway Customs Brokerage ni Rolly dela Pieza ug sa JB Sports. (BANATSPORTS)
- Latest
- Trending
