Binukbukay sa Sinulog

CEBU, Philippines - Dose ka parisan sa mga top amateur boxing prospects sa Sugbu ang magpinaksitay karong gabii sa Summit Natural Drinking Water Fight Night didto sa Gaisano Country Mall carpark.

Ang Phil-Australia Boxing Club (PABC) ug Consolacion mipadala og upat ka fighters matag-usa, samtang tulo ka Flores Boxing Club (FBC) boxers ang mosaka sa ring sa ALA Promotions ug Summit Natural Drinking Water Sinulog boxing event.

Ang Banilad, Lahug, Toledo, Butuan, Talamban ug Camotes adunay tag-usa ka boksidor nga mopakita sa ilang abilidad sa 30-62 kgs. divisions.

Unang mokatkat sa ring mao si Ramel Casañares sa Banilad batok ni Romel Tuñacao sa FBC, samtang si Johnriel Jecong moharong ni Raymond Rama sa PABC. Ang teammate ni Rama nga si Rhezon Tarona makigbinukbukay ni Melmark Dignos. Si Polid Banal sa Cabancalan moaway ni Ricardo Lopez sa Florencio Urot, Kevin Catajara batok Mark Joseph Sereño ug Reoxyl Tabogon sa Cabancalan batok ni Roldan Bereso sa Consolacion.

 Mokompleto sa fight card mao ang duha ka produkto sa University of the Visayas (UV) nga sila si Dann Lou Codilla ug Christian Apawan. Si Codilla makigsinukliay'g kumo batok ni Jovan Muñoz sa Consolacion, samtang si Apawan mobatok ni Mardy Moaña sa Camotes.

Laing PABC boxer nga si Jerome Baja makigbinukbukay ni Dominiciano Millanes sa Lahug, si Rodel Wenceslao makigtigi ni Eleno Traya ug si Mark Bernaldez mosangka ni Rhiyan Canillas sa Toledo. (BANATSPORTS)