Bullos moharong ni Delarmino sa URCC Cebu-VI
CEBU, Philippines - Sa tuyo nga mahibalik ang nahanaw niyang dungog isip usa sa mga elite MMA fighters sa nasud, ang Sugbuanong si Cary 'The Prince' Bullos subling moaway ug iyang harungon si kanhi Visayan bantamweight titlist Leonardo Delarmino sa Universal Reality Combat Championship (URCC) Cebu VI- Respect karong gabii diha sa Cebu International Convention Center (CICC), Mandaue City.
Si Bullos nawala sa eksena sa Mixed Martial Arts dul-an sa duha ka tuig human makaangkon sa una niya nga pilde sa URCC batok ni Lino Tagacay.
Apan nakakuha karon og kahigayonan si Bullos nga mabalik ang nahanaw nga respeto sa mga fight fans ngadto kaniya.
Atol sa weigh-in kagahapon didto sa Veranda Resto Bar sa Parkmall, si Bullos milapas og usa ka libra sa catch weight nga 139 lbs.
Hinuon, si URCC founder Alvin Aguilar nagkanayon nga mamahimo pang moaway ang usa ka fighter bisan pa og overweight, apan kinahanglan kini makigsabot sa kampo sa kontra o mobayad og multa.
Kun ugaling modaog si Bullos, dili niya makuptan ang URCC Visayas bantamweight title.
"Arrangement by both camps is if Leonardo Delarmino wins, he will get the belt, but if Cary wins, he will not get the belt," matud pa ni Renault Lao sa URCC-Cebu.
Sa co-main event, duha ka mga Pinoy ang moharong batok sa mga langyaw nilang kaatbang. Ang taga-Davao nga si Ricardo Sapno makiglayog ni Tom Woodfin, samtang ang walay pildeng si Jimmy Yabo makigsangka ni George Flansbaum.
Mokompleto sa undercard sa MMA event nga gisuportahan sa Colt45, mao sila si Maxlito Yong batok Agustin Delarmino alang sa Visayas flyweight title, Victor Torre batok Mark Revaldo, Limbas Noble Franca batok Jessie Tambiling, Phillip Delarmino batok Jhon Edu Torbiso ug Lorde Rey Amit batok Vaugh Donaire. (BANATSPORTS)
- Latest
- Trending
