Talisay, Mandaue daog sa GUV Cup

CEBU, Philippines - Mga title favorite nga Talisay ug Mandaue City pulos mikulit og daog sa tagsa-tagsa nila ka brackets sa quarterfinals sa 6th Governor Gwen Garcia Unity Volleyball (GUV) Cup kagahapon didto sa Cebu International Convention Center.

Ang defending City Cluster women’s champion Talisay mibuntog sa Liloan sud sa duha ka sets, 25-11, 25-23, luyo sa paningkamot ni RP team member Nerissa 'Nene' Bautista, Mechelle Matuguina, Jullett Mae Marikit, Florian Guttierez ug Marissa Lagancia.

Sa laing bahin, ang Mandaue  milampos sab pagmakmak   sa kanhi municipal cluster champion Catmon sa usa ka kulbahinam nga duwa sulod sa tulo ka sets, 25-14, 17-25, 25-20.

Nakahiagum og duha ka sakit nga kapildihan ang Alcoy batok sa Sta. Fe ug Barili, samtang gilupig sa Minglanilla ang Tuburan.

Ang mga duwa sa quarterfinals padayonon karong adlawa hangtod sa Huwebes sa mao gihapon nga binyu, samtang ang semifinals ug finals duwaon sa Biyernes ug Sabado. 

Gawas sa customized trophies, ang kampiyon sa men ug women’s division makadawat og P100,000 nga ganting salapi matag usa, samtang ang runners-up mobulsa og P50,000.  (BANAT NEWS)