Tabal ikatulo sa National Milo Marathon

CEBU, Philippines - Grabeng kalampusan ang naangkon sa teen running sensation gikan sa Southwestern University (SWU) nga si Mary Joy Tabal dihang nasulod kini sa top three sa 34th National Milo Marathon nga gipahigayun kagahapon didto sa kaulohan.

Si Tabal kinsa maoy reyna sa Cebu leg sa Milo Marathon mitapos sa makutas nga 42k full marathon sulod sa tulo ka oras, otso minutos ug 36 segundos nga maoy labing paspas sa tanang Cebu-based qualifiers nga misalmot.

Batok sa mga seasoned local runner ug mga bisitang Kenyan, milampos si Tabal pagtiwas sa lumba bisan paman og gibikugan siya sa katapusang 1.5 kilometros, apan sa tabang sa iyang mga teammate maisugun niyang gilabang sa finish line.

Si Floredeliza Donos mao ang migawas nga kampiyon ning tuiga, gisundan sa usa ka female Kenyan runner sa ikaduhang dapit.

Ang gitawag nga “Cebu’s queen of the road” nga si Mary Grace delos Santos igo lang mipwesto sa ikalimang dapit dihang nahutdan siya sa hangin sa katapusang hunat sa lumba.

“Sayang nga nakalayo ang Kenyan nako, mga 50-meters ko niya na biyaan, pero even with that, I’m so happy with what I have achieved,” matud pa ni Tabal sa The Freeman.“All I just wanted at first was to finish the race and have a good time on my first 42-k, unya na third pa gyud ko, sobra pa ni sa akong gipangayo,” 

Laing Cebuana nga si Madelyn Carter ang mipwesto sa eight place ug mao kini ang ikatulo niyang higayun nga misulod sa top 10 finisher sa women’s class.

Walay nakalusot sa mga Sugbuanon sa men’s division nga giharian sa “Marathon King” sa Pilipinas nga si Eduardo “Bistek” Buenavista. – BANAT NEWS