Pedroza hari sa Week 8 sa BRAASTAD Open chessfest

CEBU, Philippines - Miresulta sa panagtabla ang duwa ni Ramsy Pedroza batok ni Allan Salientes sa final round nga igo na kaayo alang kaniya aron maghari sa Week 8 sa BRAASTAD Open Chess Tournament didto sa Magellan Landing Bar and Restaurant duol sa Marina Mall sa dakbayan sa Lapu-Lapu.

Si Pedroza, kinsa miuyon nga magtabla uban ni Salientes human sa 53 ka duso sa Pirc defense, nagtabla uban nila ni Salientes ug Carlos Moreno III human sa lima ka hugnang Swiss system sa managsamang 4.0 points, apan siya maoy miangkon sa unang dapit pinaagi sa iyang superior tie-break output nga 15.0 points.

Si Salientes mi-okupar sa ikaduha, samtang si Moreno nalandig sa ikatulo.

Sa maong kadaugan, si Pedroza nakig-uban sa laing weekly qualifiers nga naglakip nilang Aldwin Daculan, Michael Infante, Adrian Dutosme, Lemuel Montero, Ramil Resuera, Michael Pagaran ug Eden Diano ngadto sa grand finals nga gikatakda karong Disyembre 7 didto sa Magellan Pub House.

Ang grand champion modawat og P8,000 ug usa ka botelyang Braastad X.O Cognac nga balor og P18,000. Ang ikaduha ngadto sa ikaupat makadala og P3,000, P2,000 ug P1,000 matag usa ug usa ka botelyang cognac nga nagkantidad og P5,600 matag usa.

Ang ikalima ug ikaunom mobulsa og P1,000 matag usa, samtang ang ikapito ug ikawalo makadawat og P500 matag usa.

Ang mga duwa sa BRAASTAD gidumala ni international arbiter Marvin Ruelan uban sa abag ni Tony Cabibil.

 Alang sa dugang mga kasayoran, niadtong interesado mahimong motawag ni Excel Canque sa 0923-3305581 o di ba ni Ruelan sa 0926-7352951 (BANATSPORTS)